Boiro remata este venres 9 de xullo a edición 2021 das súas Festas do Verán, un programa de concertos e actividades elaborado co obxectivo de chegar á meirande cantidade de público (a Concellaría de Cultura achegou citas e espectáculos para xente de todas as idades) e cunha marcada vertente participativa e aberta (buscouse que todos os eventos programados, en maior ou menor medida, puxeran o foco na igualdade de xénero, na cultura galega e na implicación cidadá).
A programación das Festas do Verán contou con grupos locais facendo as alboradas de cada mañá e a sesión vermú como Arume, A Dorniña de Abanqueiro, Os pequenos do Barbansa, As da Boina… Cada mañá a praza de Galicia acolleu espectáculos para público infantil e familiar. A programación incluíu tamén actuacións de grupos tradicionais e locais como Aroña, Xilbarbeira ou Abeloura e tamén programación feita polas asociacións como Unión de Muchachas.
Un total de 3.000 persoas pasaron esta semana pola praza de Galicia para ver os espectáculos de Broken Peach, Guadi Galego, The Lákazans… todos eles, segundo recalcou o Concello, “cumprindo as restricións sanitarias de control de acceso, capacidade limitada, uso de máscara e mantemento da distancia de seguridade”.
O remate da festa será esta noite, ás 22.00 horas na praza de Galicia coa actuación da orquestra Marbella. Ampliouse a capacidade ata as 500 entradas, polo que se vai permitir o acceso sen reserva previa ata completar o aforo. A actuación de Fran Sieira, que tivo que ser cancelada aínda non ten programada unha nova data pero farase durante o verán.