Dous mortos e un desaparecido (sen confirmar oficialmente) traen novamente ao mar galego tintes de traxedia. Os dous primeiros, perto da costa de Santo André de Teixido, e o terceiro -de se confirmar o feito e sen que, arestora, medie denuncia ao respecto- na ría de Coruña.
Un día treboento, con nubes de chumbo e choiva constante, o vivido hoxe na costa galega, fronte á que navegaban a primeiras horas desta tarde entre catro e cinco cerqueiros galegos que deron por rematada a costeira do bocarte no Cantábrico. Un destes barcos era o “Siempre Güeto”, con base en Portosín e un total de dez tripulantes a bordo, procedente de Asturias e que viña de descargar na lonxa de Burela as súas capturas para, unha vez chegara en Galicia, comezar aquí a costeira da sardiña con todas as esperanzas postas nas tradicionais boas vendas desta pesqueira nos días de San Xoán.Pero o “Sempre Güeto” no chegou a Portosín. Naufragou, posiblemente a consecuencia do forte temporal do noroeste que azoutaba a costa cedeiresa, especialmente entre Punta Candieira e o límite co concello de Cariño, nas inmediacións do santuario de Santo André de Teixido. O pesqueiro envorcou e dous dos seus mariñeiros perderon a vida neste accidente no que un deles, viciño de Queiruga (Porto do Son), resultou con feridas de gravidade, a consecuencia das que finou. O outro mariñeiro, de orixe marroquina, coñecido como Aníbal e con domicilio en Portosín, desapareceu no naufraxio e posteriormente foi rescatado, morto. Os outros oito tripulantes foron recuperados con vida por varios barcos que se atopaban nas inmediacións do lugar do naufraxio.
O noso máis sentido pésame e todo o noso ánimo, forza e cariño para os familiares, amigos, compañeiros e veciños da tripulación do ‘Sempre Güeto’.
🖤 D.E.P.
O mundo do mar de Galicia vive hoxe e por esta causa, unha xornada de loito que aínda será máis dura de se confirmar a desaparición do tripulante dunha pequena embarcación avistado esta tarde, arredor das 16,00 horas, abandonando o porto oleirense de Santa Cruz, segundo o testemuño de viciños desta vila. A barca en cuestión apareceu á deriva e envorcada na ría da Coruña. Todo fai pensar que poido colidir contra o pantalán do peirao petroleiro e, levada pola corrente, desprazarse ata Punta Fieiteira, fronte ao faro de Santa Cristina, onde foi recuperada.Fontes de Salvamento Marítimo da Coruña confirmaron a realización de labores de busca para localizar o corpo do tripulante da gamela, sen resultado positivo, levantando o dispositivo ao caer o día. As mesmas fontes sinalaron a este xornal que, ata o momento de redactar esta información, non existía denuncia algunha sobre a desaparición dun mariñeiro.
