A empresa galega de tecnoloxías Xoia Extending Reality vai impartir en Muros, o vindeiro 11 de xuño, un seminario sobre Realidade Virtual e Aumentada aplicada aos museos. A cita, que vén da man dos grupos galegos GALP (Grupos de Acción Local do Sector Pesqueiro), celebrarase na Fábrica Sel en Muros, a partir das 10.00 horas. Mostraranse recursos e mecanismos dos que botar man para mellorar as experiencias dos visitantes nas salas e recintos expositivos mediante as máis avanzadas ferramentas. A empresa Xoia, por certo, é a creadora do primeiro museo cen por cen virtual no ámbito español, o MUV da Fundación María José Jove.
A actividade enmárcase no proxecto Pasaporte REMA, financiado polo Fondo Marítimo de Pesca (FEMP) e na que participan os Grupos de Acción Local do Sector Pesqueiro (GALP) Galegos.
O evento, que se pode seguir de forma online, está aberto a todo o público.
O director executivo de Xoia, Xoel Vázquez explica a xeito de introdución que “o concepto de Museo 4.0 pode proporcionar unha experiencia auténtica e personalizada; que se inicia antes da propia visita ao espazo físico”.
O mapeo interior no deseño das salas ou o uso de sensores e beacons, que son pequenos dispositivos con tecnoloxía bluetooth que permiten a comunicación automatizada; son outros exemplos de avances tecnolóxicos sobre os que falará durante o seminario.
Os membros da Rede de Espazos con contido Museístico Atlántico (Rede REMA), composta por 31 museos localizados en Galicia, Portugal e Asturias, están convidados a participar no evento. Ademais, pode asistir calquera persoa ou institución interesada en pór en valor o patrimonio mariñeiro atlántico europeo.
As persoas interesadas deben realizar previamente a súa inscrición a través do correo electrónico: info@redrema.eu. A charla poderá seguirse tamén de forma virtual. Ao público que non poida acudir de forma presencial, facilitaráselles a ligazón para iso.
Programa de actividades
Relator: Xoel Vázquez, socio fundador da empresa Xoia Extending Reality
Contidos:
10:00 h. Apertura do acto e benvida a cargo da presidenta da Rede REMA e Alcaldesa de Muros Inés Monteagudo
10:10 h. Tecnoloxías aplicadas á museoloxía 4.0
10:30 h. Que é a Realidade aumentada e como funciona?
11:00 h. Casos de uso en exposicións, museos e centros de interpretación
11:15 h. Pausa café
11:45 h. Que é a Realidade Virtual e como funciona?
12:15 h. Casos de uso en exposicións, museos e centro de interpretación
12:30 h. Experiencias interactivas complementarias. Casos de éxito
12:50 h. Quenda de preguntas
13:00 h. Fin do seminario