O Concello de Noia compartiu novidades sobre a súa estratexia a prol das enerxías renovábeis. Ao fío desta liña de traballo, o Goberno local procedeu a instalar paneis fotovoltaicos na Piscina Municipal.
Esta actuación supón un investimento de preto de 48.000 euros, que implicará, en palabras do Concello, “unha importante redución no consumo tanto de pellets, como de gasóleo, combustíbeis empregados ata agora para o funcionamento da instalación”. Segundo engade, a enerxía solar permitirá cubrir, durante os meses de verán, practicamente a totalidade da enerxía precisa para o funcionamento diario da piscina, proporcionando recursos suficientes tanto para o quecemento da auga sanitaria, como a do propio vaso.
