Noia recibiu este venres 25 a visita da directora de Turismo de Galicia Nava Castro, acompañada do presidente do Clúster de Turismo de Galicia, Cesáreo Pardal e o concelleiro de Cultura do Concello de Noia, José Perez. Participaron nunha mesa redonda moderada polo docente da Universidade da Coruña Carlos Rodríguez e abeirada ao Curso de Verán da UDC (sétima edición) que se celebra na vila da nosa comarca, achegando un foro de reflexión e coñecemento sobre as análises e perspectivas coas que afronta a recuperación o Camiño de Santiago e o Xacobeo 2021-2022.
O curso desenvólvese baixo o epígrafe Unha nova visión das rutas de peregrinaxe. O Camiño de Santiago e o Xacobeo.
A directora de Turismo de Galicia destacou durante a súa intervención que “cursos coma este nos permiten facer unha reflexión común e avanzar en como cambia o fenómeno xacobeo, as múltiples posibilidades de desenvolvemento socioeconómico e turístico que ofrece a Ruta Xacobea, o seu impacto no territorio”, destacou ao tempo que incidía en que o Camiño é, e seguirá sendo, “elemento vertebrador de Galicia como territorio e como sociedade, o noso mellor embaixador, carta de presentación da marca Galicia no estranxeiro e, por suposto, elemento capital na nosa estratexia turística.
