As conserveiras e industrias pesqueiras da nosa terra atópanse estes días en Madrid, enriquecendo cos mellores produtos do mar (e os máis destacados xeitos de preparalos e servilos) o salón Madrid Fusión #alimentosdespaña. Fano da man da confederación ANFACO-CECOPESCA, que se sumou á festa gastronómica, un ano máis, con demostracións culinarias en vivo da man do chef Miguel F. Vidal, propietario de Morgana y Volandeira (Madrid), quen mostrou na tarde de onte “a versatilidade das conservas de peixes e a súa experiencia con estes produtos”.
Miguel F. Vidal, galardoado co Premio de Gastronomía de Galicia polos seus esforzos por mostrar as excelencias dos nosos produtos, preparou en directo, na caseta de ANFACO-CECOPESCA e baixo a lema Cata La lata, un amplo abano de innovadoras receitas a partir de conservas de peixes e mariscos, fusionando a tradición destes produtos coa influencia da cociña internacional.
Entre as demostracións realizadas salientaron, entre outras, as seguintes: mexillón en escabeche de Bloody Mary e kale fritido; xoubas de San Xoán, pan de boroa e crema de sardiña afumada; ou atún branco en aceite ecolóxico, salsa verde mexicana e maionesa de mango.
No salón atópanse, con caseta propia, empresas como Balfegó, Portomuiños, Petaca Chico, Aquanaria e Real Conservera. Poderán degustarse produtos das empresas Conservas de Cambados, Conservas Ortiz, Conservas Cerqueira (con sedes en Ribeira e tamén, agora, en Rianxo), Connorsa, Casa Santoña, Eurocaviar, Salgaduras Garre, entre outras.
