Axentes da Policía Nacional adscritos á Comisaría Local de Ribeira detiveron ao presunto gardador da nave onde o pasado 7 de abril foron incautadas dúas lanchas preparadas para o seu uso en operacións de narcotráfico. Os axentes fixeron saber que o agora detido estaba en paradoiro descoñecido desde que se lle puido vincular coa nave de Palmeira.
Tamén lembraron que a nave estaba “situada estratexicamente” e dispuña dunha rampla con acceso directo á ría de Arousa. Amais, cada unha das dúas embarcacións contaba cunha gran adega, unha delas tiña instalados dous potentes motores, e á outra se lle podían axustar até catro motores de gran cilindrada.
Paralelamente e ante o risco de subtracción, perda ou minoración de valor dos efectos intervidos, instouse desde a Comisaría da Policía Nacional que os mesmos fosen realizados pola Autoridade Xudicial a través do Servizo de Xestión de Bens Comisados do Ilustre Colexio de Procuradores da Coruña, polo que o Xulgado de Instrución nº.3 de Ribeira decretou tal realización.
Os bens intervidos foron agora valorados en 21.200 euros, previo á súa poxa pública. O diñeiro conseguido poderá ser utilizado na loita contra o narcotráfico.
O detido pasa a disposición xudicial. Continúase coas xestións de investigación.
