O Concello de Rianxo, a través da súa Área de Cultura, programou unha completa axenda de actividades coincidindo co celebración do 17 de maio, o Día das Letras Galegas, unha data que tamén se vai conmemorar nos días previos e nos días posteriores, ao longo deste mes de maio. Por exemplo o venres 14 está previsto que a Sala Arcos Moldes do Centro Sociocultural do Auditorio de Rianxo dea acollida á presentación do libro Castelao. Construtor da nación. Tomo II, 1931-1939, de Miguel Anxo Seixas.
A cita será ás 20.30 e contarase coa presenza do autor e, tamén de Francisco Fernández Rei, (profesor da USC e académico da RAG), Juan Conde Roa (Consorcio de Santiago) e Adolfo Muíños Sánchez (alcalde de Rianxo). Segundo informou o Concello, esta actividade viña sendo unha das accións incluídas no marco dos Actos Castelao 2021, pero tivo que ser adiada no seu día por mor da situación sanitaria.
O segundo tomo da biografía de Castelao de Miguel Anxo Seixas é unha ambiciosa reconstrución da vida e o legado artístico, político e ideolóxico do ilustre rianxeiro, debullados nun volume de tapa dura de 1.500 páxinas, presentado por Galaxia nunha coidada edición que é tamén, en palabras da editorial, “un diario da vida cotiá de Castelao cos fitos da súa cronoloxía persoal e pública”. Neste tomo o autor pon o foco nos anos comprendidos entre 1931 e 1939, coincidindo cos anos da Segunda República e a Guerra Civil.