O grupo socialista de Ribeira compartiu unha proposta de seu para ser debatida en pleno relativa ao regulamento existente nas rúas peonalizadas da localidade, que, segundo opina a agrupación, “non ofrecen un ordenamento axeitado para a amábel convivencia de peóns e vehículos”. Segundo fan saber, un exemplo destas eivas que deben ser emendadas é o que acontece cos lectores de matrículas instalados, que “non foron precisamente baratos para as arcas municipais”.
Na súa opinión, os lectores son “un atrezo carísimo” para o concello, “xa que en ningún caso cumpren a súa función, pois están desconectadas e non funcionan, co que o paso de vehículos non autorizados por zonas peonís depende só da actuación da Policía Local, a que cos medios de que dispón, entendemos que non pode facer máis do que fai”.
Os socialistas tamén critican o que cualifican de “falta de transparencia” do Concello, xa que “nos decatamos pola prensa de que o Concello acordou coa empresa Silo (Science & Innovation Link Office) que esta preste asistencia técnica e asesoramento dentro do Plan de Mobilidade Urbana Sostible Integral (EDUSI) e do programa Máis Ribeira Atlántica 2020, financiado nun 80 % con fondos europeos”.
Estes son os puntos concretos da proposta achegada polos socialistas:
-Que “se proceda de contado á reparación e posta en funcionamento de todos os mecanismos dos que dispón o Concello, tanto humanos como materiais, para realizar un control mais eficiente do trafico nas zonas peonís”.
-Que “se especifique claramente o horario de carga e descarga aos distintos negocios situados nesas zonas, para que poidan ser servidos convenientemente, e que, polos medios antes indicados, este horario fágase cumprir, impedindo o transito indiscriminado de vehículos que se saltan as normas existentes”.
-Que “calquera actuación que se realice sexa tratada e consensuada cos grupos que forman a oposición, para darlles a posibilidade de opinar e achegar ideas e matices, antes de atoparnos, como vén sendo costume deste equipo de Goberno, coas présas de ultima hora para tomar decisións e aprobar investimentos porque xa están os feitos consumados”.
