O Club do Mar Noia recibe a visita de Cristina Capelán e Sandra González, da Deputación da Coruña

A deputada de Deportes da Deputación da Coruña, Cristina Capelán, e a deputada responsable da área de Educación, Sandra González, visitaron as instalacións do Club do Mar Noia. O ente provincial colabora coa entidade a través das súas subvencións deportivas.
A relación entre o Club do Mar Noia e a Deputación da Coruña permitiulle ao Club adquirir unha barca a motor, varios remoergómetros e un remolque para o transporte de embarcacións. Ademais, este ano a entidade solicitou axuda para a adquisición de novo material que lle permita cumprir o obxectivo que pretende a Deputación con estas subvencións: mellorar as infraestruturas da provincia.
No encontro, o club transmitiulles ás deputadas a súa preocupación ao non contar a provincia cun lugar balizado permanente para realizar tests. Ademais reclamaron unha ampliación das instalacións, que se quedan pequenas ante o crecemento da entidade.
“Seguimos a traballar nas nosas axudas para ofrecer o maior apoio posible a clubs como este para mellorar as infraestruturas e ofrecer unhas instalacións axeitadas aos deportistas”, sinalou Capelán.
O Club do Mar de Noia conta con 80 deportistas federados, entre os cales se atopa unha persoa na modalidade adaptada, así como o único representante de Galicia nas olimpíadas de Tokio na categoría de remo olímpico, Caetano Horta.