O BNG esixe aumentar as zonas verdes de Ribeira e critica as talas de árbores nas Carolinas

O BNG de Ribeira vén de facer un chamamento ao Concello para que incremente as zonas verdes e as rúas con vexetación no termo municipal. Ao mesmo tempo, no comunicado os nacionalistas critican a política do Goberno local polos estragos de árbores levados a cabo na avenida da Coruña, onde, segundo informa a agrupación, elimináronse cos traballos desenvolvidas na rúa exemplares de gran tamaño.

O voceiro da formación, Xosé Vázquez Cobas explicou que estas árbores cortadas puideron ter sido transplantadas a outros espazos do municipio: “Optaron pola vía fácil de talar algunhas das xa poucas árbores que hai no municipio, un feito que vai no sentido contrario ao que se debera”, fixo saber, engadindo que a obra da avenida da Coruña, nas Carolinas, “é unha oportunidade perdida, porque esa reforma debería ter sido aproveitada para facer un gran bulevar con espazos de sombra e zonas verdes”. Na súa opinión, a aposta do Concello é unha aposta “polo cemento e a herba de plástico”.

O BNG sinala que “Ribeira ten un número insuficiente de zonas verdes” e desde a agrupación consideran “imprescindíbel” aumentar a vexetación que hai nas rúas e prazas do municipio “co fin de mellorar a calidade do aire e tamén a calidade de vida da veciñanza, sobre todo nun contexto de pandemia onde tan necesarios son os espazos ao aire libre”. Xosé Vázquez Cobas puxo en valor o traballo feito polo BNG presentando “propostas construtivas” e mesmo un plan denominado “Reverdecer Ribeira” para que o casco urbano e as parroquias gañasen espazos verdes nos que as persoas poidan descansar e desfrutar do seu tempo libre.