Detidas en Ribeira nove persoas por tráfico de drogas

A Policía Nacional de Ribeira levou a cabo unha nova operación antidroga, denominada “Rayo”, que se saldou coa detención de nove persoas por tráfico de drogas, sendo o resultado de varios meses de investigación.

Os policías da Comisaría de Ribeira seguían os pasos dun home que desde un principio sospeitábase que contactaba con distintos individuos que se adicaban á súa vez ao tráfico de drogas, aínda que, nun chanzo inferior. O principal investigado, que non tiña antecedentes policiais por tráfico de drogas, non adoitaba repetir o lugar de trasnoitar, nin adoitaba usar telefonía móbil, e sempre usaba a persoas da súa contorna para trasladarse en diferentes vehículos, todo iso para dificultar o labor policial.

Durante a investigación policial constatáronse varios pisos de Ribeira polos que o principal investigado se movía, mesmo se puideron incautar pequenas cantidades de substancia estupefaciente, o que derivou nas distintas entradas e rexistros domiciliarios.

Como resultado dos rexistros das vivendas incautáronse: 1.177 gr. de cocaína, 103 gr. de heroína, 953 gr. de haxix, 60 gr. de marihuana, 6.070 €, cinco teléfonos móbiles, cinco balanzas de precisión, e útiles para manipular a cocaína.

Nun dos rexistros foi posíbel incautar un morteiro, paletas e amoníaco cos que manipular e “cociñar” a cocaína, xa que o investigado adquiría a cocaína en quilo de “ladrillo”, tal e como chega a España directamente dos países produtores en Sudamérica, “o que denota a importancia desta detención”, segundo os axentes. Unha vez “cociñada” por unha persoa da súa confianza, a cal tamén foi detida, distribuíaa entre distintas persoas para a súa venda directa aos consumidores.

Unha parte de substancia estupefaciente aprehendida noutra vivenda foi descuberta grazas á labor dos Guías Caninos, xa que foron estes os que puideron situala detrás dun armario encaixado, nun dobre fondo, sendo inobservábel á vista da Policía Xudicial.

Dentro deste operativo policial contra o tráfico de drogas en Ribeira, a Policía Nacional incautou tamén dúas pistolas, simuladas, aínda que, causaron bastante inseguridade na zona da rúa Cristóbal Colón, xa que dous individuos, un o pasado mércores e outro o 23 de maio, mostraron na vía pública armas de fogo, debido ás rifas e desavinzas no submundo do consumo e tráfico de drogas. O primeiro, detido no seu día, está vinculado ao punto negro de venda de drogas na rúa Cristóbal Colón, e o segundo foi agora detido por tráfico de drogas dentro da Operación Rayo.

No dispositivo policial para levar a cabo as detencións, aprehensións de drogas, e rexistros por axentes da Comisaría local de Ribeira, prestaron o seu apoio operativo os grupos GOES, UPR e Guías Caninos da Xefatura Superior de Policía de Galicia.

Tras tramitarse as correspondentes dilixencias policiais, os detidos foron postos a disposición xudicial, aínda que, a Xuíza de 1ª Instancia de Instrución nº.1 de Ribeira decretou o ingreso en prisión de dous deles. A operación continúa aberta e non se descartan novas actuacións.