O Concello de Noia e a Xunta (Axencia Galega de Infraestruturas da Consellería de Infraestruturas e Mobilidade) celebraron esta fin de semana o Día Internacional da Cruz Vermella. E fixérono cunha iniciativa de homenaxe ao importante labor humanitario desta organización, unha actividade simbólica que consistiu en iluminar a ponte sobre a Ría de Noia coas cores branca e vermella.
Así, desde o solpor do sábado ata a 1 da madrugada do día 9, a ponte de Noia luciu un xogo de luces que intercambiaban o vermello e o branco, en homenaxe a esta organización humanitaria.
A Xunta atendeu así a petición formulada pola Cruz Vermella de Noia para conmemorar o Día Mundial deste colectivo, que coincide coa data de nacemento do seu fundador, Henry Dunant, e co que se recoñece o traballo que os seus voluntarios e empregados realizan en todo o mundo.
