A estudante de saxofón María Núñez Figueiras realizará este mércores o seu recital de fin de grao profesional. A actuación será no Conservatorio de Música Profesional de Ribeira ás 18:30 horas.
María Núñez, nada en Cambados, comeza a tocar o saxofón cursando o grao elemental no Conservatorio Elemental de Música de Cambados. Ao longo da súa vida, María recibiu clases do profesor Rodrigo Vila e outros docentes convidados como Nicolas Prost, David Brutti ou Phil Pierick. Ademais, participou en numerosos cursos e clases maxistrais con saxofonistas de prestixio internacional como Marie-Bernadette Charrier, Daniel Gauthier ou Carlos Ordóñez.
O programa incluirá tres pezas. Unha delas será Fantasía para saxofón soprano e piano, de Heitor Villalobos. Tamén tocará Preludio, Cadenza et Finale, de Alfred Desenclós; e Sonata de Edison Denisov.
A saxofonista estará acompañada por Brais González.
