Noia vai acoller o vindeiro 21 de maio unha actividade divulgativa e formativa sobre xeitos sustentábeis de xerar riqueza e emprego. A Xornada de Bioeconomía e Economía Circular celebrarase ás 19.00 horas no edificio do Casino de Noia. Desenvolverase baixo o seguinte epígrafe: Cara a unha economía local rexenerativa. A sesión encádrase dentro do proxecto europeo Circular Labs, no que a Fundación Paideia Galiza toma parte xunto con outras 10 organizacións.
O principal obxectivo deste proxecto, en palabras dos organizadores, é a integración da Economía Circular en novos modelos de negocio, e, tamén, “acelerar a transición dun modelo lineal a un modelo circular baseado na eficiencia no uso dos recursos”.
As prazas son limitadas, previa inscrición na web de Paideia.es. Nesta xornada tamén colabora a Asociación Deloa.
