A Deputación financia con 150.000 euros a renovación da estrada que conecta A Ponte de San Francisco con San Breixo, en Noia

A Deputación da Coruña financia a renovación da estrada que vai de A Ponte de San Francisco a San Breixo, en Noia. O Plan Único da entidade provincial financia o 100% do custo total do proxecto, 149.363 euros. A Deputación fai saber que os traballos permitirán limpar esta estrada, que se atopa na parroquia de Santa María de Argalo, así como levar a cabo a reparación de fochas e a pavimentación con aglomerado de 5 centímetros. Tamén se levantarán as actuais tapas de rexistro e as reixas de sumidoiro.

“Estas tarefas darán solución ao mal estado no que se atopa actualmente a plataforma debido ao paso dos anos e o tránsito rodado”, fixo saber o ente provincial, engadindo que o Plan Único “segue así a dar apoio aos concellos da provincia para mellora as súas infraestruturas, neste caso dunha estrada, co obxectivo de ofrecer unhas vías de comunicación seguras á veciñanza que reside na zona e ás persoas que transitan por esta vía”.