A Audiencia absolve a un sospeitoso de traficar con droga en Boiro ao non haber “proba directa”


A Sección Sexta da Audiencia Provincial da Coruña, con sede en Santiago de Compostela, absolveu a un sospeitoso de traficar con droga na localidade coruñesa de Boiro ao non existir “proba directa da comisión dun feito delituoso” por parte do acusado.

O tribunal considera acreditado que o 16 de marzo de 2007 no curso dunha instrución na que eran investigadas varias persoas, practicouse entrada e rexistro no domicilio do acusado, onde se atopou un caderno con debuxos e anotacións, catro teléfonos móbiles e 200 euros.

Con todo, no fallo resalta que “non existe neste caso proba directa da comisión dun feito delituoso por parte do acusado”. “Non foi visto realizando actos de tráfico de drogas. Non se atopou droga na súa poder”, destacan os xuíces.

Na sentenza, o tribunal sinala que o Ministerio Fiscal sostén a tese acusatoria alegando a existencia de indicios que considera suficientes para inferir que o acusado realizaba actividades de tráfico de drogas.

Así, menciona o achado de droga en poder doutras persoas que foron axuizadas de forma independente na peza separada do presente proceso; a utilización polo acusado do teléfono terminado en que relaciona con el pola declaración dun garda civil ao que lle pareceu a súa voz, a localización na contorna de Boiro e as manifestacións espontáneas do acusado dicindo que o tirou á ría. Con todo, en opinión da Sala “eses indicios non permiten realizar unha inferencia sólida, o suficientemente pechada para ter a certeza de que o destino da droga era a súa distribución entre terceiros”. A Audiencia da Coruña absolve a este procesado do delito contra a saúde pública polo que foi acusado e declara de oficio as costas do proceso.