Os participantes no Campus de Outes visitaron o Museo do Pobo Galego

Finalmente chegaron ao seu remate as actividades do Programa Universitario de Maiores organizado en abril pola Universidade de Santiago e Concello de Outes, a través do seu Centro Social. Fixérono cunha visita das e dos asistentes ao campus ao Museo do Pobo Galego, en Santiago de Compostela.

O programa consistiu nunha iniciativa formativa para veciñas e veciños de máis de 50 anos, destinada a incrementar os seus coñecementos e a súa autonomía, amais de favorecer hábitos activos de aprendizaxe. Incluíu tres seminarios (sobre a investigación histórica dende a óptica local, sobre como construír unha personaxe para unha obra teatral e sobre envellecemento saudábel) e dúas visitas ao Campus compostelán que remataron coa devandita estadía das e dos participantes no Museo do Pobo Galego, este 16 de abril. A visita ao museo contou coa presenza de Raúl Soutelo Vázquez, profesor do Departamento de Pedagoxía e Didáctica da USC.