O Grupo Municipal Socialista vén de presentar unha moción que solicita unha revisión, de xeito inmediato, dos bens incluídos no Plan Especial de Protección e Reforma do Casco Histórico de Noia, e dotar unha partida nos orzamentos para os que precisen unha actuación urxente.
A iniciativa foi exposta no pleno ordinario deste mes de abril, e serviu para que os socialistas de Noia reclamaran a conservación e posta en valor dos elementos patrimoniais de titularidade, ou xestión pública, e que pasen a ser unha das prioridades do Goberno municipal. Así, aproveitan para destacar que este 2021 ano santo é o momento exacto “para que a vila e para que o Camiño de Santiago que percorre Noia teñan un recoñecemento ao seu nivel canto antes”.
Ademais dos anteriores puntos citados, os socialistas propuxeron chegar a un acordo co Goberno municipal á hora de xestionar coa Deputación e a Xunta de Galicia unha serie de subvencións para a conservación e posta en valor do Patrimonio de Noia, e a súa contorna. “Sendo Noia unha das vilas máis antigas de Galicia e con esta riqueza
patrimonial, debemos conservar e poñer en valor, tanto como divulgadores, coma gardiáns da historia que contén a nosa vila e que posúe cada pedra do casco histórico”, destacou o voceiro Roberto Iglesias.
