Nova xornada no grupo B da Preferente Norte Galicia na que o Noia empatou (1-1) deixou escapar dous puntos fronte ao Xallas nos minutos finais e o Puebla venceu pola mínima (1-0) contra o Pino. O CD Boiro non disputou a súa xornada fronte ao SD Dubra por mor dos casos positivos que sufre o conxunto de Barraña.
Noia CF 1 – 1 Xallas FC
O Julio Matito acolleu o encontro entre o Noia CF e o Xallas, dous conxuntos que acadaron bos resultados neste inicio de liga e que terminaría en empate logo de que o conxunto local deixara escapar dous puntos nos intres finais do partido.
O cadro dirixido por Iván Carril mostrou a súa superioridade dende o minuto un, imprimindo un gran ritmo ao xogo e creando numerosas ocasións, que darían froito ao primeiro tanto do encontro no minuto 13 obra de Hugo. A primeira metade foi un constante acoso por parte do Noia, mais non puideron converter esas oportunidades en goles que permitiran ampliar a vantaxe.
Os segundos 45 minutos seguiron a mesma tónica, cos brancos creando ocasións e chegando con perigo e co Xallas defendendo como gato panza arriba para frear as acometidas dos xogadores locais. Logo de tanto perdoar, o Xallas aproveitou a súa única ocasión tras unha xogada embarullada na área e colocaría o definitivo empate a un no minuto 77.
Tras este empate o Noia deixa escapar a posibilidade de afianzarse no primeiro posto e afastarse dos seus perseguidores. A próxima cita dos noieses será no derbi fronte o CD Boiro, se a COVID o permite.
Puebla 1 – 0 Pino SD
O Puebla conseguiu a súa primeira vitoria (1-0) da temporada a costa do Pino SD, que segue sen puntuar neste comezo de competición. O encontro tívose que disputar a porta pechada polo aumento de casos de COVID-19 no municipio.
Comezou o conxunto de Anxo Casalderrey metido no encontro e inclinando o campo ao seu favor, con dominio de balón e igualando a intensidade que exercían os visitantes á hora de recuperar a posesión. Falcón, no minuto 25, anotou un penalti que puxo o 1-0 no electrónico, mais a pesar de resultar contraditorio, logo do tanto os branquiazuis comezaron a despregar un fútbol lento e trabado.
O marcador mostraba un resultado apertado, algo que deu folgos ao Pino para tentar buscar o primeiro punto da temporada no tramo final do encontro. Gozou o Puebla dalgunha ocasión para sentenciar o encontro, mais non o lograron e sufriron para amarrar un triunfo nun partido gris e pobre por parte de ambos conxuntos.
Con estes tres puntos o Puebla acada así a súa primeira vitoria na Preferente e sitúase con 4 puntos, a dous da segunda praza que da acceso á fase de ascenso para a Terceira División. O vindeiro domingo o cadro de Casalderrey visitará ao Xallas, nun partido que se presume clave para as aspiracións de ambos equipos no que resta desta temporada exprés.
