As deputadas do BNG no Parlamento galego, Rosana Pérez e Iria Carreira, visitaron Noia este 12 de abril para emitir a súa valoración acerca do proxecto para a construción dun novo centro de saúde nunha parcela de 660 metros cadrados do barrio de San Lázaro. Despois de ollar o predio no que se pretendería erguer o dito centro sanitario, Carreira opinou “que se trata dunha opción inadecuada para unha infraestrutura de futuro, xa que a tendencia no eido da arquitectura sanitaria é a de realizar centros de saúde cunha base ampla que permitan unha mobilidade accesíbel e grandes estancias para as persoas usuarias”.
Pola súa parte Pérez, coincidindo na importancia de que un novo centro de saúde sexa construído en Noia, insistiu na necesidade de que o mesmo “sexa realizado nunha parcela adecuada para unha infraestrutura que dará servizo a unhas 33.000 persoas” e lembrou que “en ningún caso se podería comprender que un novo centro de saúde tivera unha planta inferior ao actual”.
Na súa opinión, o edificio deberá “ter perspectivas de futuro”, polo que “terá que contar cunha planta amplamente superior aos 1.000 metros cadrados do existente, requisito que non cumpriría a parcela de 660 metros cadrados anunciada polo alcalde de Noia”.
Neste contexto, o portavoz da formación no municipio, Ricardo Suárez, informou de que veñen de presentar unha iniciativa para o seu debate no vindeiro pleno ordinario na que apostarán pola “consecución por parte do Concello de Noia dunha parcela superior aos 2.000 m2 de planta e 4.000 m2 de edificabilidade” co gallo de ser cedida á Consellería de Sanidade.
