O Equipo de Normalización e Dinamización Lingüística do IES Félix Muriel de Rianxo e o Servizo de Normalización Lingüística do Concello están a colaborar novamente na organización do ciclo de relatorios Camiñando entre mulleres.Este martes 6 de abril as e os estudantes do dito centro educativo teñen unha cita coa poeta Alba Cid.
O ciclo, en palabras do Concello, é unha actividade educativa que procura achegar ao alumnado do centro educativo referentes femininas que destacan no seu ámbito profesional empregando a lingua galega: operarias, investigadoras, escritoras, muralistas…
Este ano participan no ciclo María Xesús Lama, Nerea Vázquez, Lupe Blanco, Helena González, Lara Torres e Alba Cid.
Quenda de Alba Cid
Como dixemos, o ciclo despega este día 6, coa visita da poeta ourensá Alba Cid ao alumnado do IES Félix Muriel. Gañadora do Premio Nacional de Poesía Joven Miguel Hernández no ano 2020 polo seu poemario Atlas, Alba Cid está considerada como unha das escritoras máis prometedoras do noso panorama literario. Poemas para enfiar unha nova cartografía será o nome do obradoiro que impartirá, dirixido concretamente ao alumnado de 1º de Bacharelato.