A asociación empresarial Noia Histórica vai celebrar o Día da Nai este domingo 2 de maio cunha orixinal proposta de portas abertas destinada a incentivar as compras ao tempo que se recoñece a fidelidade da cidadanía cos establecementos de proximidade (tan necesaria nestes tempos de crise sanitaria e económica). A través desta nova campaña polo Día da Nai, Noia Histórica sorteará 20 almorzos entre as persoas participantes.
O sorteo levarase a cabo o día 4 e os nomes das persoas premiadas faranse públicos a través das redes sociais. A iniciativa acompáñase dun rechamante e singular cartel que é unha homenaxe cinematográfica a Breakfast at Tiffany’s, a histórica película protagonizada por Audrey Hepburn.
Os almorzos (valorados en 30 euros) entregaranse no domicilio das veciñas e veciños gañadores ou nos que eles mesmos indiquen.
Na iniciativa participan 80 establecementos locais. As rifas repartiranse até o 2 de maio.
