A Concellería da Cultura da Pobra do Caramiñal vén de anunciar a posta en marcha dunha actividade a través de Facebook como motivo do Día Mundial do Libro, datado o 23 de abril.
A situación epidemiolóxica actual por mor da COVID-19 provoca que o Concello leve a cabo unha actividade en liña que consiste en que a veciñanza colgue no Facebook a fotografía do seu libro favorito ou dalgún libro que estea a ler actualmente. A publicación deberá comezar polo hashtag #APobraLe, seguido do título da obra, autor/a e a explicación do porqué desa elección, así como se deberá etiqueta-las páxinas da Biblioteca Municipal da Pobra do Caramiñal e de Cultura A Pobra do Caramiñal.
O prazo para participar na iniciativa vai do día 23 ata o 25 de abril, ambos inclusive. Ademais, como agradecemento a tódolos participante á hora de fomentar a lectura sortearanse, o 28 de abril, 4 libros, 2 en galego e 2 en castelán.
