O proxecto DiversidArte recala na Pobra cun show musical e danza integrada

O Teatro Cine Elma acollerá o 10 de abril dúas actuacións combinadas adscritas ao proxecto DiversidArte, impulsado pola Asociación Poten100mos. Serán ás 19.00 horas. A axenda inclúe o show musical Improvisóns e máis unha sesión de danza integrada da man de Ricardo Prado.

O primeiro destes espectáculos será unha cita interactiva do público para contribuír, conxuntamente, á creación de cancións efémeras e irrepetíbeis, pero non por iso menos importantes.

O segundo, segundo fixo saber este luns a concelleira dos Servizos Sociais, Amparo Cerecedo (BNG), “sorprenderá as persoas asistentes co ritmo e a enerxía”. A edil cualificou a cita como “moi especial” e animou a veciñanza a acudir.

O proxecto DiversidArte é un soporte creado para a promoción, produción e difusión da arte onde as súas principais protagonistas son as persoas con diversidade intelectual, física, psíquica e sensorial, xunto con outros colectivos en situación de risco de exclusión, con actividades que fomentan as sinerxías e a súa propia inclusión como artistas dentro da sociedade.

A entrada é de balde até completar a cabida e seguiranse as medidas establecidas por mor da COVID-19. As persoas interesadas en asistir dispoñen ata o día 9 de abril para se inscribiren a través do enderezo electrónico servizos.sociais@apobra.gal ou do teléfono de contacto 981843280, marcando as extensións 2011 ou 2014.

Organiza a Asociación Poten100mos, coa colaboración da Concellaría dos Servizos Sociais da Pobra do Caramiñal e co financiamento da Deputación da Coruña e da Obra Social La Caixa.