O grupo socialista de Noia pide que se arranxe o paseo de madeira da praia de Boa

O Grupo Socialista de Noia presentou un rogo para ser debatido en pleno relativo ao paseo de madeira que percorre a praia de Boa Grande, que, segundo sinala a agrupación, “atópase en moi mal estado”. Segundo indican, trátase dunha construción de madeira que precisa dos mantementos específicos para este tipo de infraestruturas, que ademais están especialmente sometidas ás inclemencias do tempo e ao efecto do mar. Froito disto, sinalan, hai varios treitos onde as madeiras están “totalmente podres ou directamente rotas”.

O voceiro Roberto Iglesias, indicou que “unha vez que se instalaron as pasarelas de acceso á praia, debeuse realizar unha revisión de toda a estrutura, xa que ca chegada do bo tempo son moitas as persoas que fan uso desta instalación para pasear, e son varios os puntos que se atopan nun estado perigoso, como nos trasladaron veciños da contorna, e puidemos comprobar nunha recente visita ó lugar”.

Os socialistas solicitarán “que se faga unha intervención o antes posíbel, antes de que se poda producir un accidente, xa que hai lugares onde a varanda está totalmente no aire e cunha altura considerábel no caso de que se produza algunha caída”.

Os integrantes da agrupación indican que seguirán percorrendo as parroquias de Noia, para trasladar ao Goberno municipal este tipo de situacións que, segundo indican, “mostran un total desleixo nas

parroquias, por parte do Executivo”.