O BNG reclama unha mellora do estado dos paseos de madeira de Ribeira

O Bloque de Ribeira insta a renovar moitas das estruturas de madeira, que hai no municipio de Ribeira, destinadas ao paseo. Co aumento das temperaturas e a proximidade do verán, dende a sede bloquista denuncian o mal estado de moitos destes tramos, como o paseo de Coroso.
O concelleiro do BNG, Luis Pérez Barral, asegura que “non é un caso illado e noutros paseos tamén hai estragos nos camiños e pasarelas, e en moitos casos non é posible substituír algunhas destas infraestruturas xa que o seu estado non permite o arranxo”.
Ademais, o BNG ribeirense lembrou a iniciativa aprobada por unanimidade no mes de decembro para loitar contra os plásticos nos areais, e reclaman un “aumento na limpeza destes espazos”.
Así, os nacionalistas trasladarán esta petición ao Pleno do Concello para que se de solución a esta problemática, xa que “co bo tempo vaise a incrementar o número de camiñantes nestes espazos de lecer e débense poñer a punto para que os veciños e veciñas os empreguen de forma cotiá”.