O BNG vén de rexistrar unha proposta non de lei (PNL) e novas interpelacións ao Goberno da Xunta en referencia á necesidade de instalar pasos de peóns e mellorar a seguridade viaria na estrada AC-550 ao paso polo municipio de Noia. Os nacionalistas impulsan unha iniciativa tras “obter unha resposta pouco concreta por parte por parte da Consellería de Infraestruturas e Mobilidade”, sinalan, engadindo que na contestación, logo de tres meses, o departamento da Xunta enumera unha serie de condicións para a habilitación de pasos de peóns na AC-550 ao seu paso por Noia “sen explicar , de todos os propostos, cal ou cales son os que non cumprirían os requisitos técnicos exixidos”.
O BNG visitou estes días as contornas do concello por onde pasa a AC-550, amais de consultar a normativa vixente e realizar medicións sobre plano en dúas zonas concretas onde os pasos de peóns son necesarios e poderían ser axeitadas para habilitalos: “O primeiro sitúase nas inmediacións dunha marquesiña próxima á vivenda número 47 da estrada de Orro en Noia, e o segundo localízase diante do establecemento Hostal Singapore, da parroquia noiesa de Boa”, explican. Ademais, sinalan que nos dous casos “estamos a falar de percorridos amplamente iluminados, nos que a velocidade máxima permitida para o tránsito de vehículos é de 50 km./h., onde o aparcamento está restrinxido en ambas direccións dos potenciais pasos de peóns, con beirarrúas en ambas marxes da estrada e cunha recta de 240 e 260 metros respectivamente, na que se cumprirían sobradamente os requisitos para a visibilidade de parada.”
O grupo parlamentario pide na súa proposta que se leve a cabo “un estudo pormenorizado” e “a redacción dun informe concreto sobre estes puntos no que se detallen as actuacións necesarias para que se podan habilitar pasos de peóns seguros”. Tamén solicitan que “se leven a cabo as actuacións necesarias para que estes pasos de peóns podan ser habilitados coas máximas garantías e que finalmente se proceda á colocación de pasos de peóns nos dous puntos citados nos lugares de Orro e Boa ao paso da AC- 550 polo municipio de Noia”.
