A organización medioambiental e divulgativa Montescola celebrou o Día da Árbore (este domingo 21 de marzo) cunha nova plantación de especies galegas en Lousame. Fíxoo na aldea sustentábel e activista de Froxán, en colaboración (novamente) coas Brigadas Deseucaliptizadoras de Verdegaia. Participaron trinta voluntarias e voluntarios, incluíndo familias e crianzas. A actividade, en concreto, consistiu nunha intervención ambiental na zona conservada do Portelo da Devesa, en Froxán (Lousame), eliminando eucaliptos e acacias e plantando varios centos de carballos.
Os traballos desenvolvéronse en pequenos grupos para gardar as medidas de seguridade. Coa intervención restaurouse unha zona de máis de 3.000 m2 que ardera na vaga de lumes de 2006 e na que agora o bosque autóctono “volta a recobrar o seu resplandor”, explicaron dende Montescola, engadindo que a zona recuperada presenta un hábitat de interese comunitario de carballeiras galaico-portuguesas con Quercus robur e Quercus pyrenaica que forma parte dun proxecto de maior envergadura para a conectividade e continuidade destas zonas de intervención coa Área Conservada pola Comunidade de Froxán, recoñecida pola ONU en 2017.