O Concello de Ribeira informa da licitación dos traballos para renovar os servizos na rúa do Vilar (Palmeira). O obxectivo é substituír os equipamentos urbanos de auga potábel, saneamento e pluviais, “xa moi antigos”, explicou o Goberno local.
Con tal motivo redactouse un proxecto técnico que inclúe as seguintes accións:
• Auga: substituirán as tubaxe existente por outras de PVC de alta densidade con 160 milímetros de diámetro e 300 metros de lonxitude, realizando as acometidas aos inmóbeis.
• Saneamento de fecais: instalarase un colector de PVC de 315 milímetros de diámetro e 300 metros de longo. Disporanse pozos de rexistro cada 35-40 metros e nas conexións cos colectores existentes.
• Pluviais: disporase un colector de PVC de 315 de diámetro e 300 metros de longo que conducirá as augas por gravidade ata a rede existente na rúa do Barreiro. Colocaranse arquetas sumidoiros cada 30 metros e pozos de rexistro a algo menos de 40.
A intervención comporta un investimento de 134.602,26 euros, con IVE, enmarcados no Plan Provincial de Cooperación ás Obras e Servizos de Competencia Municipal (Plan Único de Concellos) POS+ 2019. O prazo de execución son catro meses.
As empresas interesadas dispoñen ata o 12 de abril á medianoite para a presentación da súas ofertas a través do Sistema de Licitación Electrónica da Xunta de Galicia (SILEX).