Este 25 de marzo inaugurouse no adro da igrexa de Santa Uxía unha destacada exposición fotográfica do histórico estudio local Lesmes Fotógrafos adicada á Semana Santa. A mostra, organizada polo Concello en colaboración coa parroquia de Santa Uxía, leva por título Fe, Arte, Contemplación. O acto contou coas intervencións do alcalde Manuel Ruiz, do párroco Alfonso Mera, da concelleira de Cultura María Sampedro e de Manuel Iglesias no nome de Lesmes Fotógrafos, responsábel das vinte instantáneas que comprenden a iniciativa (tamén estivo a súa irmá Flora Iglesias).
Entre os asistentes figuraban concelleiros de distintos grupos da Corporación, así como representantes da igrexa na comarca, membros de organizacións benéficas e club de xubilados e veciñas e veciños que se achegaron atraídos polo impactante das imaxes, un coidado percorrido fotográfico polo profundo significado que ten a celebración da Semana Santa en Ribeira, visto a través das persoas da localidade que se implican nela e a viven.
Manuel Ruiz declarou que a Semana Santa non só é unha celebración relixiosa senón tamén “arte e cultura” e “con esta perspectiva se quixo organizar esta exposición na que podemos contemplar os actos e ritos que a compoñen a través dos ollos da familia Lesmes”, dos que repasou a súa multipremiada traxectoria: un currículo no que tamén fixo fincapé María Sampedro lembrando que este ano optan a galardóns tan prestixiosos como os Premios Goya ou o certame organizado pola Federación Europea de Fotografía.
Alfonso Mera subliñou que a través das distintas capturas faise un percorrido polo triduo pascual, principiando polo Domingo de Ramos e concluíndo na Resurrección. O cura párroco loou as fotografías de Lesmes Fotógrafos pois “a súa mirada axúdanos a ir máis alá, a ver cousas que moitas veces non vemos”.
Pola súa parte, Manuel Iglesias manifestou que a súa intención foi transmitir unha “imaxe próxima” e expresou o seu desexo de que “a xente se acostume a visitar exposicións desta índole”.
A mostra consta dunha selección de vinte obras tomadas no 2019 de gran formato dispostas en cinco estruturas modulares con dimensións de dous metros por dous metros.
A maior parte delas son en branco e negro e están acompañadas de textos alusivos.
