O Concello de Ribeira comezou os traballos para pavimentación de tres camiños situados no lugar de Sirves na parroquia de Olveira. As obras están sendo efectuadas pola empresa Nemesio Ordóñez, S.A. e comportan un investimento de 119.972 euros, IVE incluído, enmarcado no Plan Provincial de Obras e Servizos.
O obxectivo que se persegue con este proxecto consiste en mellorar os firmes actuais de tres vieiros a base dunha nova pavimentación asfáltica en quente de entre cinco e seis centímetros de espesor.
Con tal motivo, estase a condicionar unha superficie de 7.050, 2.115 e 230 metros cadrados, respectivamente, estendendo un total de 304 toneladas dunha mestura bituminosa.
