Quen queira mercar unha vivenda nos centros históricos de Noia, Rianxo e Muros, vai ter importantes axudas do Goberno galego, axudas que poden chegar aos 15.000 euros nalgúns casos específicos. Os detalles destes apoios foron dados a coñecer este 23 de marzo polo delegado territorial da Xunta na Coruña, Gonzalo Trenor, durante unha visita á Cidade Vella da Coruña. Segundo fixo saber, as axudas xa se poden solicitar.
Abranguen, na provincia, os concellos de Betanzos, Corcubión, A Coruña, Ferrol, Mugardos, Muros, Neda, Noia, Padrón, Pontedeume, Rianxo e Santiago de Compostela.
O representante do Goberno autonómico destacou que “o obxectivo principal co que se puxo en marcha este programa é o de contribuír a fixar poboación de forma estábel nestas zonas, lugares emblemáticos e cunha grande riqueza patrimonial e arquitectónica”
Segundo a resolución publicada no DOG, as persoas interesadas poden solicitar estas axudas até o vindeiro 1 de setembro.
Trátase da terceira convocatoria deste programa, que “para 2021 contará cun orzamento de 600.000 euros, case seis veces máis que a dotación coa que saíu convocada o ano pasado”, sinalou, facendo un repaso dalgunhas das principais novidades postas en xogo, por exemplo a supresión do requisito de sermos menores de 35 anos para poder optar ás axudas, de tal xeito que se estende a consideración de potencial beneficiario ao conxunto dos galegos, “co fin de favorecer o asentamento de poboación nos conxuntos históricos”.
Trenor destacou que a contía das axudas elévase ata os 15.000 euros nas tres áreas Rexurbe declaradas en Galicia como é o caso da Coruña, onde estas axudas son de maior contía. Nos demais casos o importe da subvención variará en función da idade do solicitante, de forma que se a vivenda foi adquirida por unha persoa maior de 35 anos, o importe máximo a percibir será de 10.800 euros; unha contía que se ampliará ata os 12.800 euros cando os solicitantes sexan menores de 35 anos.
Trenor engadiu que a outra gran novidade refírese aos requisitos económicos de acceso, medida “coa que se busca tamén ampliar o abano de potenciais beneficiarios”. Neste sentido, o límite de ingresos dos solicitantes elévase até 6,5 veces o IPREM (48.877,33 euros), o que correspondería a case o 90% dos fogares galegos, “co obxectivo de adecuarse aos prezos actuais do mercado inmobiliario e máis concretamente, á realidade do custo da vivenda nos centros históricos”.