A rúa Romero Ortiz de Ribeira deu este martes un histórico paso en materia de seguridade e mobilidade. Segundo confirmou o Concello, xa están operativos os novos semáforos instalados no treito baixo do devandito vieiro, á altura do barrio do Pombal, que é, precisamente, o que presentaba máis problemas de accesibilidade e comodidade, xa que a súa estreiteza e a ausencia de beiras provocaba continuos problemas entre peóns e vehículos, ao que se engadía o factor velocidade dos segundos.
O Concello confirmou que neste tramo de vía (dende a praza de Compostela en dirección á confluencia da vía coa rúa Cervantes) resultaba aconsellábel, por motivos de seguridade, “alternar o paso regulado de vehículos a motor”.
Os elementos dispostos xa están en funcionamento, se ben nos vindeiros días está previsto colocar algún outro, confirmaron dende o Consistorio.
A rúa Romero Ortiz constitúe a terceira zona da cidade de Santa Uxía ordenada por medio de semáforos, logo das actuacións emprendidas no paseo do Malecón no 2011 e na avenida Miguel Rodríguez Bautista e rúas adxacentes no 2015.
