O Concello da Pobra informou este mércores 3 pola noitiña da reapertura ao tráfico da estrada AC-302 despois de que o temporal do día anterior producise a caída de varias árbores no tramo que vai dende a aldea da Tomada a Moldes.
No lugar estivo persoal da brigada de mantemento de estradas, persoas voluntarias da Protección Civil, axentes da Garda Civil de Tráfico e bombeiros, ademais dunha empresa de traballos forestais, entre outros operarios.
A circulación estivo interrompida dende a madrugada do mércores 3 de febreiro ata preto das 21.00 horas do mesmo día. Durante ese tempo efectuouse a retirada das árbores, procedeuse cos labores de mantemento da calzada e realizáronse traballos de acondicionamento na contorna.