Este xoves 11 de febreiro o local na céntrica rúa de Rosalía de Castro da Asociación de Empresarios de Ribeira acolleu unha xuntanza para traballar na cuestión sobre o proxecto do novo polígono industrial do concello. Na reunión participaron (entre outras e outros representantes do tecido produtivo ribeirense) o actual presidente da entidade, Francisco Martínez Gude, e máis Antonio Miranda, Cipriano Paz e Manuel Álvarez Vázquez, todos eles estreitamente vencellados á directiva da asociación (que tiveron ocasión de presidir en períodos anteriores).
No transcurso da sesión acordouse propor ao Concello a creación dunha comisión bilateral de seguimento que teña reunións periódicas no tempo, “co fin de unificar criterios e actuacións para levar a bo fin a realización de tan ansiado polígono”, sinalaron.
Esta proposta contou co apoio unánime de todos os presentes.
Segundo confirmaron fontes da asociación, á xuntanza asistiron “un bo número de socios”, incluídos aqueles que apostan por solicitar unha superficie aproximada de 80.000m2.