O servizo de reparto a domicilio de Rianxo fortalécese con mochilas térmicas

Estes días deuse a coñecer unha importante novidade dende o servizo de reparto a domicilio habilitado dende a plataforma Mercarianxo, co fin de posibilitar que os establecementos hostaleiros locais poidan ter certa normalidade ao abeiro das actuais medidas restritivas que non autorizan a súa apertura. A novidade consiste na posta a disposición da cidadanía que tire proveito do servizo Rianxo na túa porta dunhas mochilas térmicas específicas que faciliten ao máximo a entrega e o transporte de produtos dende os restaurantes adheridos á iniciativa até os domicilios.

A intención, segundo contan dende Mercarianxo, é conseguir que a comida que saia dos establecementos chegue ás casas rianxeiras como “saída directamente das cociñas”.

Por certo que en este momento están a participar activamente na iniciativa, carrexando xantares e ceas porta por porta, os seguintes locais do concello: Parrillada Ourense, Guggenheim Bocatería, Restaurante O Vilar, Restaurante Tanxil, O Curral do Marqués e Bar Nova Era. A listaxe poderase actualizar con novas incorporacións en calquera intre.