O parque de Punta do Castro (Castiñeiras) presenta un imaxe nocturna espectacular dende esta semana. O motivo? O prendido das luminarias de baixo consumo que vén de instalar o Concello na contorna e que permiten o desfrute da mesma logo do solpor. As luces culminan o equipamento dunha área de lecer rehabilitada e recuperada en 2015 para o uso cidadán.
Agora, a contorna dispón de 26 luminarias sobre columna e 2 proxectores para as pistas deportivas, ademais de 12 balizas baixas que dan continuidade ás existentes nas pasarelas das praias de Castro e Catía e o paseo do Carreiro posterior.
Cómpre lembrar que esta actuación enmárcase na EDUSI Máis Ribeira Atlántica 2020, financiada nun 80% polo Fondo Europeo de Desenvolvemento Rexional dentro do Programa Operativo de Crecemento Sustentábel (POCS) 2014-2020. Adscríbese a liña de actuación deste plan denominada Mellora da Eficiencia Enerxética na Administración Pública, dentro do obxectivo temático número 4 (Economía Baixa en Carbono).
O Concello explica que ademais da referida actuación, o proxecto incluíu outras intervencións de instalación ou renovación de luces LED na franxa litoral do municipio: no paseo de Insuela, no paseo da Ameixida, no entorno portuario de Aguiño, así como nas referidas pasarelas das praias de Castro e A Catía e do paseo do Carreiro, sumando un investimento global de 447.629,46 euros.
