A Xunta e o Concello de Lousame acordaron diferentes actuación para complementar o miradoiro da Muralla, unha instalación que recibirá a axuda da Consellería do Medio Rural co obxecto de actuar como dinamizador do turismo asociado á natureza. As primeira actuacións que se esperan son a mellora dos accesos e habilitar un espazo de estacionamento no miradoiro da Muralla.
No encontro entre o conselleiro do Medio Rural, José González, e a alcaldesa de Lousame, María Teresa Villaverde, e a directora xeral da Axencia Galega de Desenvolvemento Rural, Inés Santé, abordaron as diferentes posibilidades que abrirá a futura Lei de recuperación da terra agraria de Galicia, para dinamizar e poñer en valor o agro de Lousame. A intención ofrecida polo conselleiro trata de axudar á recuperación de terreos en desuso ou infrautilizados, mediante ferramentas como as aldeas modelo, os polígonos agroforestais ou as agrupación de xestión conxunta.
A rexedora municipal agradeceu o ofrecemento do conselleiro, e comprometeuse a estudar as posibilidades para impulsar o medio rural do concello de Lousame.
