O BNG de Noia critica as obras levadas a cabo na senda de acceso á aldea abandonada de Xei

O Bloque Nacionalista Galego de Noia vén de achegar un comunicado sobre a necesidade de poñer en valor a aldea abandonada de Xei, a súa contorna fluvial (eliminando especies alóctonas) e a súa rede de camiños (facendo accesíbel a senda que vai polo río Traba). No comunicado, ao mesmo tempo que enumeran as iniciativas que deberan terse feito para reivindicar a natureza e o patrimonio do dito núcleo, critican duramente as actuacións de acondicionamento que se están a levar a cabo en Xei.

“O resultado dos traballos recentes”, din, “non xeran máis que estupefacción para os visitantes”. E engaden: “Descoñecendo cal será o resultado final, o avance actual da intervención non denota máis que unha clara falta de sensibilidade por parte do Goberno local”.

Así, sinalan, a senda que leva a Xei, “lonxe de mellorar”, converteuse “nunha suma de saburras mal dispostas e que non son nin tan sequera homoxéneas”.

A saburra (zahorra en castelán), engaden, é un material que debe empregarse para compactar zonas concretas nas que se complica o paso pola irregularidade do terreo para despois ser cuberto por terra da zona. Na sua opinión, “ten que aplicarse do xeito máis sensíbel que se poda para diminuír o seu impacto estético e ecolóxico”. Porén, no caso acontecido en Noia, explican, “substituíuse o emprego testemuñal e profesional deste material para mellorar as condicións do terreo pola conversión ao mesmo no protagonista dun pavimentado que é difícil de cualificar doutra maneira que de esperpento”.

E conclúen: “É ben triste que unha acción de valorización que podía ser aplaudida de xeito consensuado polo conxunto dos noieses e noiesas se veña a converter nun incomprensíbel e estrafalario erro que non merece esta contorna”.