O Partido Nacionalista noiés emitiu estes días un comunicado no que sinala que “é de vital importancia poñer en marcha unha plataforma de comercialización que acolla a todo o empresariado e a todos os sectores económicos da localidade”. Dito soporte, din, “debe estimular a economía de proximidade, sobre todo neste momento de pandemia”. Ricardo Suárez, o portavoz do BNG en Noia, sinalou que “é un servizo que xa debera existir, como acontece en moitos dos municipios da contorna”.
O BNG levou a proposta ao pleno da Corporación municipal, no que decidiron renunciar á votación dos acordos en aras de acadar un consenso unánime nos obxectivos. Desta forma, antonte convocouse unha reunión na mesa de comercio local, co fin de achegar os diversos puntos de vista. Tras a congregación, os nacionalistas concordaron na importancia de poñer en marcha este servizo aberto a todo o empresariado.
O colectivo Noia Histórica adoptou o compromiso de traballar nunha proposta a partir das conclusións ás que se chegaron na reunión, que será presentada e valorada por unha nova mesa de comercio o próximo 23 de febreiro.
Doutra banda, o partido sinala a necesidade de renovar a composición da Mesa de comercio local para que sexa máis plural, considerando que o colectivo Praza de Abastos (USPAN) debería estar presente, xa que ten moita importancia no ámbito comercial.