Reivindicar a gastronomía do Entroido foi o obxectivo dunha experiencia gastronómica celebrada este xoves 11 polo alumnado do obradoiro de emprego O Pote II de Ribeira. Foi, en concreto, unha degustación de produtos destas datas (orellas e filloas) destinada á comunidade da asociación local AMBAR.
A elaboración dos produtos típicos celebrouse no segundo andar do edificio do mercado municipal, a cargo do alumnado-traballador deste programa de emprego, da especialidade Operacións Básicas de Cociña, que dirixe o mestre Patxi Movilla.
O obxectivo da actividade foi, segundo informou o Concello, “o de achegar a estes usuarios/as os produtos e elaboracións típicas da nosa cultura culinaria, facendo entrega das mesmas nas súas instalacións, sempre adaptándose á nova normalidade e gardando, en todo momento, as medidas hixiénico-sanitarias derivadas da situación actual da COVID-19”.
O Pote II comezou o pasado 15 de novembro de 2020 e terá unha duración de 12 meses. É un programa mixto de emprego e formación que ten por finalidade mellorar a ocupabilidade das persoas participantes, neste caso, 15 moz@s incluídas no ficheiro do sistema nacional de Garantía Xuvenil, promovido polo Concello de Ribeira, subvencionado pola Consellería de Economía, Emprego e Industria e co-financiado pola Iniciativa de emprego xuvenil e o Fondo Social Europeo para o período 2014-2020.
