Noia mostrará en verán unha nova fachada marítima

O alcalde de Noia, Santiago Freire Abeijón, anunciou que Noia mostrará en verán unha nova fachada marítima, xa que se agarda que os traballos estean rematados en xullo. A actuación dará continuidade á executada por Portos de Galicia na franxa entre o Peirao do Marqués e Costa Ferrador.

O proxecto supón un custe total dun millón de euros e inclúe a ampliación da rotonda que une a ponte do Campo das Rodas cos peiraos de Gasset e Cardaso, ademais da construción dunha pasarela cunha plataforma paralela ao tránsito peonil. Santiago Freire explicou que “dende fai dúas semanas retomáronse as obras de instalación da pasarela de estrutura voada e nestes momentos, estase acopiando para iniciar a súa colocación, que se vai levar a cabo ao longo das vindeiras semanas”.

O obxectivo principal das obras é mellorar a seguridade peonil e o aspecto e funcionalidade da fachada marítima. Doutra banda, os traballos aliviarán a circulación do tránsito de vehículos por medio de dous peiraos e renovarán infraestruturas de saneamento e de abastecemento de auga, entre outras.