Se o Entroido foi quen de chegar a nós despois de séculos e máis séculos de historia (e de anos de prohibición), é moi probábel que cunha situación como a que estamos a vivir a festividade só requira cambiar un algo de formato e punto de vista. Poñerse, en definitiva, no lado da protección, a responsabilidade e, tamén, da creatividade. Así o entenderon no Concello de Ribeira, que, a través da Concellería de Cultura que dirixe María Sampedro, vén de convocar un Concurso de Máscaras de Entroido que se vai desenvolver nas redes sociais, principalmente no Facebook.
O certame é un convite ás rapazas e aos rapaces para que deseñen cadansúas máscaras ou caretas, as inmortalicen nunha fotografía e suban logo a imaxe resultante ao seu Facebook etiquetándoa a EntérateCulturaFestasXuventude e incluíndo o hashtag #EntroidoRibeira2021. As persoas participantes entrarán nun sorteo de seis vales de compra en xoguetes por importe de 50 euros. O concurso está destinado a nenas e nenos de entre 3 e 13 anos. Quen precise máis datos sobre a iniciativa, amais de consultar as bases, pode facelo na web www.ribeira.gal.
A área de Cultura de Ribeira puxo en marcha este concurso co fin de “poñer en valor de xeito virtual o Entroido neste contexto de pandemia sanitaria”, e facelo “animando á cidadanía a participar dende as súas casas a través do deseño de máscaras, caretas, antifaces tradicionais de carnaval para a poboación infantil e xuvenil de xeito que entre todos os participantes que cumpran coas bases se realizará un sorteo de 6 vales de compra en xoguetes valorados en 50 € cada un”.
