Aprobada en Noia a proposta do BNG para habilitar estacionamentos con motivo da campaña de vacinación

O Centro de Saúde de Noia nunha imaxe de Canal Rías Baixas

O Bloque Nacionalista Galego de Noia informou da aprobación, por parte da Corporación municipal, da proposta achegada polo BNG para habilitar estacionamento específico para a campaña de vacinación. A iniciativa, que obtén luz verde por unanimidade, consiste en subministrar prazas de aparcamento na contorna do Centro de Saúde noiés para o uso exclusivo daquelas persoas maiores e/ou con mobilidade reducida que teñan que acceder ao edificio sanitario durante a campaña de vacinación que se está a desenvolver para a inmunización da poboación fronte á COVID.

O BNG presentou esta iniciativa en forma de emenda de adhesión á proposta do grupo socialista de instar á Xunta a facilitar a realización de probas PCR na localidade noiesa.

O BNG fai saber que o PSdG aceptou a emenda, xa pactada cos nacionalistas con anterioridade, nun punto que foi aprobado coa unanimidade do pleno.

Dende a formación nacionalista amosan ledicia por un acordo que “non supón un grande esforzo pero redundará nunha maior comodidade para as persoas que acudan ao centro” e din agardar que “o Goberno local faga efectiva a proposta o máis axiña posíbel”.