O Concello da Pobra vén de sumarse ás celebracións do Día de Rosalía de Castro, que se conmemora este 24 de febreiro co fin de reivindicar o vixente legado da poeta de Padrón, en palabras do Concello “un dos máximos expoñentes da nosa idiosincrasia”. En concreto, o Executivo pobrense vai conmemorar a dita data cun xogo-concurso para a rapazada. Tamén haberá un acto institucional e unha ofrenda floral, respectando ao máximo as medidas anti-COVID.
O programa foi dado a coñecer este venres 19 de febreiro pola concelleira da Cultura, Patricia Lojo (PSdeG-PSOE), quen sinalou que “é preciso continuar co labor divulgativo de Rosalía”, unha escritora que “é un luxo para as nosas letras”.
Segundo anunciou, unha das actividades desenvolverase o día 24 ás 13.00 horas, “respectando as medidas sanitarias adoptadas pola situación epidemiolóxica derivada da COVID-19 e tras realiza-las consultas pertinentes á Administración autonómica”. Consistirá no tradicional acto institucional que incluirá unha lectura pública e unha ofrenda floral e que se vai levar a cabo na praza pobrense que leva o nome da inmortal escritora galega.
Así mesmo, Cultura impulsa este ano unha iniciativa innovadora: a proposta As sete Rosalías. Trátase dun xogo-concurso dirixido ás crianzas para lles achegar Rosalía de xeito didáctico e cun compoñente lúdico.
Máis polo miúdo, a técnica municipal desta área, Fita Sanisidro, explicou que xa o título desta iniciativa pretende dar traslado da mensaxe de que “Rosalía é unha muller polifacética, pois é a escritora, a nai, a loitadora, a reivindicadora”. A dita actividade consiste en atopar varias siluetas recortadas coa forma de Galicia que conteñen no seu interior o rostro da intelectual acompañado de versos seus. Estas pezas expóñense nos escaparates de diversos establecementos locais da Pobra dende o día 22 ata o 28 de febreiro. O desafío reside en buscar nos escaparates dos locais do municipio as 7 versións diferentes da imaxe que ilustra o cartel deste ano, xa que non todas son iguais.
Poden participar no concurso todos aqueles nenos e nenas pobrenses con idades comprendidas entre os 6 e 12 anos que conten cun dos impresos repartidos nos colexios Salustiano Rey Eiras e Pilar Maestú Sierra.
Unha vez atopadas, será preciso anotar no folleto cal é esa diferenza e en que instalación se sitúa. De lograren superar o reto, deben entregar os impresos debidamente cubertos cos datos requiridos nos centros de ensino xa mencionados.
No 2 de marzo realizarase un sorteo entre tódolos cativos e cativas que acertaran o desafío, e efectuarase o reparto dun total de 25 premios consistentes nunha botella térmica e uns auriculares sen fíos.
Finalmente, a concelleira expresou o seu agradecemento aos establecementos que toman parte deste xogo-concurso e animou os pequenos e pequenas da casa a participar, respectando as medidas establecidas por mor do coronavirus.
A edil engadiu que unhas actividades pensadas co obxectivo de que Rosalía de Castro “estea presente en tódalas casas e traballándose especialmente coas nenas e cos nenos, pois son eles quen lle seguirán dando voz”.