A asociación noiesa Misela, centrada na inclusión social dos colectivos de persoas con diversidades funcionais ou de calquera outra índole, fixo un esforzo especial nesta campaña comercial do 14 de febreiro (San Valentín) para engalanar os establecementos de Noia Histórica. O obxectivo foi máis alá da simple decoración: tratábase de incentivar ao máximo o compromiso da cidadanía co comercio de proximidade, agora que son máis necesarios ca nunca ese compromiso e esa fidelidade.
Os traballos despregados pola comunidade de A Misela consistiron na elaboración de corazóns ecolóxicos e moi orixinais para encher, en palabras do colectivo, “Noia de amor”. Tanto a nivel presencial como nas redes os elementos decorativos despregados nas tendas e locais de Noia Histórica recibiron eloxios de maneira unánime.
