A Policía Local de Ribeira vén de facer balance da actividade xerada ao abeiro dos seus dispositivos para frear o avance da pandemia no concello e evitar entre a poboación comportamentos que infrinxan as disposicións das autoridades. No que vai de ano, os axentes xa tramitaron un total de 50 denuncias por vulneración da normativa anti-COVID.
A casuística das denuncias é moi variada: dende persoas que se saltan o peche perimetral ou fan caso omiso do toque de queda, pasando polo feito de non levaren máscara, fumar sen gardar a distancia requirida ou ocasionar ruídos por festas nos domicilios.
A policía ribeirense anunciou que seguirá “vixilante para tratar de atallar estas condutas incívicas que, aínda que minoritarias, repercuten negativamente na loita colectiva contra a pandemia”.