O grupo Rianxo en Común, a través do seu voceiro Julián Bustelo, presentou unha proposta para fortalecer a ampliar as medidas que o Concello está a desenvolver para axudar á hostalería local nun contexto, o actual da pandemia e das fortes medidas restritivas para atallala, no que se intensifican as consecuencias negativas para o sector. En concreto, propoñen habilitar un servizo de reparto de comidas que non teña custe para os establecementos.
Segundo explica a agrupación, “vivimos un momento absolutamente excepcional para moitas veciñas e veciños, despois de case un ano de restricións que se ven agravadas polo durísimo golpe que representan as novas disposicións de xaneiro e febreiro para a mediana e pequena economía rianxeira, e particularmente para o sector da hostalería”.
Rianxo en Común sostén na súa proposta que o Goberno de Rianxo, así como os dous grupos políticos que o conforman, o BNG e o PSOE, non poden seguir poñéndose se perfil e mirando cara a outras administracións á espera de medidas de apoio”. A fío disto e tendo en conta o que implica a orde deste 26 de xaneiro (que até o 17 do mes seguinte os locais de hostalería só poderán prestar servizos de entrega a domicilio ou para a súa recollida no local), o grupo cidadán propón que a asignación económica que mensualmente reciben os grupos políticos da Corporación se adique á contratación dun servizo de reparto de comidas e produtos a domicilio para ofrecelo de maneira gratuíta á hostalería do termo municipal.
