Os socialistas de Noia piden a Sanidade que permita facer as probas PCR no Centro de Saúde local

No pleno de xaneiro, o grupo socialista local vai presentar un moción relativa ao Centro de Saúde de Noia, co obxectivo de instar á Consellería de Sanidade a que dote cos medios precisos o dito centro de asistencia, “para que a cidadanía poida facer as probas diagnósticas da COVID-19 sen ter que desprazarse a Santiago de Compostela”.

O PSdG-PSOE de Noia informa de que houbo casos de persoas con sintomatoloxía compatíbel coa COVID-19 que foron citadas para as PCR no CHUS, “e ante a imposibilidade de poder ir en vehículo propio, se lles indica dende o servizo telefónico do SERGAS que se despracen en taxi ou transporte público para poder realizar as probas”, sinalan.

Dende o Grupo Municipal do PSdG-PSOE consideran que “ante o risco de aumentar os contaxios a familiares, traballadores, ou usuarios do transporte público e taxistas; dende o Concello de Noia débese solicitar á Consellería de Sanidade que o SERGAS descentralice este servizo, e dote ao Centro de Saúde de Noia cos medios precisos, materiais como persoais, para que se podan facer estas probas diagnósticas da COVID sen ter que desprazarse ata o Hospital Universitario de Santiago”.

O voceiro do grupo municipal, Roberto Iglesias, considera que “Noia pode ser o lugar axeitado para que a veciñanza do noso Concello e localidades próximas non se teñan que desprazar a Santiago a facer este tipo de proba co prexuízo que supón para as persoas que se teñen que desprazar, e o risco para os posíbeis contactos no desprazamento, no caso de que finalmente sexan positivos”.